2014 жылғы 8-12 желтоқсанда Жезқазған қалалық Қазақ-түрік лицей-интернатында Тарих апталығы өтті.

Апталық барысында ел тарихын көз алдымызға әкелген шара «Көшпелілердің қала және дала мәдениеті» атты көрмесі болды. Көрмеге ата-бабалар заманындағы тұрмыстық бұйымдардан бастап, ұрпақ қамы үшін жаумен алысқан сәттерде қолданылған қару-жарақтар қойылды.

Елімізде 2015 жылы тойланғалы отырған Қазақ хандығының 550 жылдығына орай Кенесары ханның көтерілісі жайлы деректі фильм лицей шәкірттеріне көрсетіліп, соңында оқушылар мен мұғалімдер фильмдегі деректерді талқылады. Сондай-ақ, фильм барысындағы түсініксіз жайттарға байланысты оқушылардың сұрақтарына Қазақстан тарихы пәнінің мұғалімі Думан Баекенов жауап берді. 

Білім ұясының акт залында өткізілген іс-шарада «Отырардың күйреуі» атты қойылым қойып, оқушылар Шыңғыс хан заманын сахналады. Сонымен қатар, апталық барысында «Ел аңсаған тәуелсіздік тұғырым» тақырыбындағы қабырға газетінен сыныптар арасында сайыс өтті. Нәтижесінде, жүлделі бірінші орынды 9«А» сыныбы, екінші орынды 8«А» сыныбы, ал үшінші орынды 10«А» сыныбы иеленді.

Жуырда Астана қаласында «ZIAT» ғылыми-әдістемелік орталығының ұйымдастыруымен «Ұлағатты ұстаз» атты VI  Республикалық оқытушылар сайысы өтті. 

Сайыс шарты бойынша әрбір қатысушы өзінің білім беру әдіс-тәсілдерімен және сол тәсілдер нәтижесінде шәкірттерінің шыққан биігі, сондай-ақ, мұғалімнің өз жетістіктері жоғары болуы тиіс еді. Аталмыш сайысқа Жезқазған Қазақ-түрік лицей-интернатының Қазақ тілі пәні мұғалімі Жанұзақова Зәуреш Тұрсынқызы қатысып, ІІІ дәрежелі дипломмен марапатталды.

ЖезҚТЛ ұжымы Зәуреш Тұрсынқызын құттықтай отырып, алдағы жылдарға сәттілік тілейді!

    

Үстіміздегі жылдың 1-5 желтолқсанында Жезқазған қалалық Қазақ-түрік лицей-интернатында «Физика апталығы» өтті.

Апталық барысында 7-сынып оқушылары арасында «Egg Drop» атты шара ұйымдастырылып, жұмыртқаны тастау арқылы балалар оған жан-жақты зерттеулер жасады. Апталықтың әр күнінде Физика пәні бойынша олимпиадаға қатысатын оқушылар «Demonstration» деп аталған шарада шағын эксперименттік жұмыстар жасады. 8-сынып оқушылары арасында өткен «Propeller Car» жарысы барысында қатысушылар жасаған пропеллермен жүретін машиналардың күшін сынады.

Ал, «Bridge» жарысына 9-сынып оқушылары қатысып, өздері түрлі материалдар арқылы жасаған көпірлерінің күшін сынап, қанша массаны көтере алатынын байқатты. «The best Song about physics»  деп аталған ән сайысын 9-10 сынып оқушылары арасында өткізді. Онда барлық қатысушылар физика ғылымына байланысты өлең шығарып, оған қалауларына қарай кез-келген әннің музыкасымен сүйемелдеп, сахнада орындап берді. Апталықтың соңғы күнінде 10-сынып оқушылары «Cannon» сайысына қатысты.

Апталық барысында өткізілген әрбір сайыстың жеңімпаздарына сыйлықтар табысталды.

2014 жылғы 28 қарашада Жезқазған қалалық Қазақ-түрік лицей-интернатында «1 желтоқсан – Тұңғыш Президент күні» құрметіне орай концерт өтті.

Мерекелік шараға білім ұясының басшылары мен мұғалімдер және оқушылар қатысты. Бағдарлама бойынша, ең алдымен мемлекеттік Әнұран орындалды.

7-сынып оқушылары Елбасына арналған қара өлеңдерді мәнерлеп оқып, «Балбырауын» күйін орындады. Нұрсұлтан Әбішұлына арналған «Арнау» атты жаңа әнді Демеу Қайрақты нақышына келтіре айтқанда көрермендер әрбір сөзіне мән бере тыңдады. Арасында «Жылдар сөйлейді» атты Қазақстан мемлекетінің құрылуынан басталып, бүгінгі күніне дейін көрсетілген бейнебаян ұсынылды. Елбасымыздың «Нұрлы жол» атты Жолдауы туралы ақпараттар айтылып, «Жастар күйі» атты күй орындалды. «Көк тудың желбірегені» атты патриоттық әнді 8«Б» сынып оқушысы Елжас шырқаса, «Жаса, Қазақстан»-ды 8«А» сыныбында оқитын Ерасыл орындады.

                                  

Халық даналығындағы «Ханда қырық кісінің ақылы болады» деген сөз текке айтылмаса керек. Елінің дамуы, тұрақтылығы, Ұлы көштен қалмауы үшін небір қиындықтарды өткеріп келе жатқан Н.Назарбаевтың еңбегін халқымыз аса жоғары бағалайды. Кең-байтақ даласындай пейілі дархан елін сүйген азамат ретіндегі Елбасы болмысы қандай құрметке болса да лайық.

2014 жылғы 27 қарашада Жезқазған қалалық Қазақ-түрік лицей-интернаты Мысты қаланың «Қарттар үйінде» болып, биыл елімізде үшінші рет тойланғалы жатқан Тұңғыш Президент күніне орай концерттік-бағдарлама ұсынып, ондағы тұрғындарға мерекелік көңіл-күй сыйлап қайтты.

Шарада қазақтың қара домбырасымен күй тартылып, ән айтылды. Көңілді тапқырлар клубы қысқа әзілдерімен күлдіртсе, кейбір өнерпаздар өмірден алынған оқиғаларды сахналап, қариялардың көңілдерін толқытты. Мерекелік шараға лицейдің 7-10-сынып оқушылары арасынан өнерлі балалар қатысып, қазақ, орыс, түрік тілдерінде түрлі жанрда тебірене ән шырқап, би биледі.

«Қарттар үйінің» мәдени шараларын ұйымдастырушы Л.Кәлімова ханыммен жолыққанда бұл ортаның жай-күйін сұраған болатынбыз.

Ләззат Кәлімова, «Қарттар үйі» маманы:

• Біздің үйімізде 200-ден астам тұрғын бар. Бәрі де белгіленген жүйе бойынша жүріп-тұрады. Негізінен тұрғындарымыздың ешқайсысында бос уақыт болмайды. Әркім өз мүмкіншілігі мен қызығушылығына қарай үйірмелерге – «Домбыра», «Гитара», «Көркем өнерпаздар», «Қолөнер», «Көркемсөз» және т.б. қатысады. Одан бөлек, кітап оқиды, радио тыңдап, теледидар қарайды. Кез-келген мерекені де атаусыз қалдырмаймыз. Жеке меншік, мемлекеттік мекемелермен тығыз байланыстамыз. Оның ішінде, білім беру саласынан үнемі концерттік-бағдарламасымен келіп, тұрғындарымыздың көңілін марқайтады. Бүгін, міне, қаламыздағы Қазақ-түрік лицей-интернаты келіп, бізді қуантып отыр. Бұл лицейдің шәкірттері жиі келіп қарттарымызға құрмет көрсететіндіктен сүйсініп тамашалайды. Осы ұжымға алғысымды айтамын.  

P.S. Аталған үйдің тұрғындарының көңілін аулап, оларды қуантып қою мақсатымен әрбірінің қолына ұстататын кішкене болса да сый-сияпатымызбен баратынбыз. Сонда жылдан жылға олардың саны көбейіп жатқанын байқадық. Мәселен, былтырғы жылмен салыстырғанда онда биылғы қарттар мен мүмкіндігі шектеулі жандардың саны 71 адамға өскен. Жезқазған қаласындағы тұрғындар санына қарағанда бұл тым көп болғандықтан осы мәселе мені толғандырып жүрген еді. Ләззат ханымның айтуынша, бұл үйдің тұрғындары облыстың түкпір-түкпірінен жиналады екен. Бәрібір де «Неге көбейеді?..» деген сұрақ мазалай береді... Қарияларымызды қадірлей білейікші.

Тұңғыш Президент күні құтты болсын, ағайын!

2014 жылғы 8-10 қазанда Қарағанды қалалық Назарбаев зияткерлік мектебінде футболдан дарынды балаларға арналған мектеп оқушылары арасында спартакиада өтті.

 Аймақтық «Сарыарқа дарыны» ғылыми-практикалық орталығы ұйымдастырған сайыстың негізгі мақсаты – салауатты өмір салтын насихаттау және елімізде аталған спорт түрін дамытуға үлес қосу. Сонымен қатар, облыс көлеміндегі дарынды командаларды анықтау.

Облыстық спартакиадаға жергілікті Назарбаев зияткерлік мектебі, №1 Қарағанды ҚТЛ, «Мұрагер» ДБМИ, «Дарын»ДБМИ, Нұрмақов атындағыДБМИ, №7 Жамбыл атындағы ДБМИ, Қарағанды Өнер мектебі және №3 Жезқазған ҚТЛ оқушылары қатысты.

Жезқазған қазақ-түрік лицей-интернатының 9, 10, 11-ші сынып оқушыларынан құралған команда құрамында 15 ойыншы болды. Олар бірінші кездесуін №7 Жамбыл атындағы ДБМИ командасымен өткізіп, 4:0 есебімен алға шықса, келесі ойында «Мұрагер» ДБМИ футболшыларымен кездесіп, 2:0 есебімен жеңді.

Келесі топтық ойында Назарбаев зияткерлік мектебінің құрама командасымен 1:0 есебін көрсетіп, финалға өтті. Осылайша №1 Қарағанды ҚТЛ командасымен болған финалдық кездесуде бар күш-жігерін салған Жезқазған ҚТЛ командасының футболшылары 3:0 есебін көрсетіп, жеңіске жетті.

Мысты шаһардың 60 жылдық мерейтойына орай үстіміздегі жылдың 18-19 қазанында Жезқазған қазақ-түрік лицей-интернаты өз шәкірттерінің ата-аналары арасында спорттық сайыстар өткізді. Турнир қатысушылары шахмат, теннис және волейбол ойындары бойынша бақ сынасты.

«Лицейге тек баласының сабақ үлгерімі мен бағыт-бағдары жайлы мәлімет алуға келетін ата-аналар қауымы бұл шара барысында ұстаздармен емен-еркін араласады. Осылайша, ата-ана, бала мен мұғалім атты «үштіктің» арасында тығыз қарым-қатынас орнайды. Мұның жастарға тәрбие мен білім беру мәселесінде оң әсерін тигізері анық. Бұл спорттық шарамыздың негізгі мақсаты да осы. Әрі оқушыларымызды салауатты өмір салтын сақтауға баулуды көздедік», - деді Жезқазған қазақ-түрік лицей-интернатының директоры Нұрғазы Утебаев турнирдің ашылу салтанатында.

Турнирге аталмыш білім ұясының барлық сыныптарының ата-аналарынан құралған командалар қатысты. Шахмат пен теннис ойындары лицей ғимаратында өтсе, волейбол сайысы қаладағы «Ұлытау» спорт кешенінде өтті.

Екі күнге созылған жарыстың жалпы командалық есебі бойынша, сайысқа қатысып, жүлделі І орынды иеленген – 8«б», ІІ орынға – 9«а», ІІІ орынға – 7«б», ІV орынға – 10«а» сыныптарының ата-аналары ие болды.

Ал, волейбол сайысының жеңімпаздары төмендегідей:

І орын – 10«а»; ІІ орын – 11«б»; ІІІ орын – 8«б».

Ерлер арасындағы теннистен жеңімпаз-әкелер:

І орын – Нұрхамит Елбай; ІІ орын – Марат Башаров; ІІІ орын – Саят Серіков.

         Әйелдер арасындағы теннистен жеңімпаз-аналар:

І орын – Татьяна Арысова; ІІ орын – Жанат Жәнібекова; ІІ орын – Гүлбаршын Үсенбаева; ІІІ орын – Мира Ахметова; ІІІ орын – Ләззат Абылаева.

         Шахмат сайысының жеңімпаздары:

І орын – Жамбыл Нұрманов; ІІ орын – Кенжеханов Ғалымкен; ІІІ орын – Ерлан Жұмакешов; ІV орынға – Магзумов Ережеп.

Марат Бекмағамбетов, қалалық мәслихат депутаты:

- Ұлым лицейдің 10«a» сыныбында оқиды. Осы лицей-интернат ұстаздарының ұйымдастыруымен спорттық сайыстар ғана емес, балалар мен ата-аналар қарым-қатынасы, дін мен қоғам қарым-қатынасы секілді көптеген тәрбиелік мәні бар жиналыстар жиі болып тұрады. «Ұлытау» спорт кешеніндей қаланың зәулім сарайын алып, екі күннен бері бүкіл ата-аналар мен оқушыларды қуанышқа бөлеп жатқан ҚТЛ-дің басшылығына алғыс айтамын. Өзімнің мамандығым басқа болғанымен, спортқа жастық шағымнан жақынмын. Мұнда волейболдан команда капитанымын. Топ мүшелерінің ұйымшылдығы арқасында жылбойы өзара жаттығу ойындарын өткіземіз. Міне, биыл 3-рет қатарынан кубокты иеленіп отырмыз.  

   

2014 жылғы 10-13 қазанда Алматы қаласында «Жас дарын» жасөспірімдер мен балалар арасындағы ІІІ Республикалық өнер байқауы өтті.

         Байқау 4 номинация бойынша – «Дәстүрлі ән», «Дәстүрлі күй», «Эстрадалық вокал» және «Хореография» бойынша өткізілген. Осы өнер сайысында бақ сынаған Жезқазған қазақ-түрік лицей-интернатының 7-сынып оқушысы – Демеу Қайрақты. Ол «Дәстүрлі ән» номинациясы бойынша қазақтың қара домбырасын арқалап барып, халық әні – «Өнерлі өлке» және «Ақ бұлақ» әндерін орындады. Жас ерекшелігіне сай аталған номинацияға 21 өнерпаз қатысқан. Оның арасынан кең диапозон, ерекше орындау шеберлігімен топ жарып шыққан Демеу Қайрақты Бас жүлдеге лайықты деп табылған.

Жастардың шығармашылық деңгейін көтеріп, олардың бойындағы музыкалық-эстетикалық тәрбиені жетілдіру мақсатында өткен байқауды «НұрАй» продюсерлік орталығы мен «Жас Отан» жастар қанаты бірігіп ұйымдастырған.

   

2014 жылғы 29 қазан  мен 4 қараша күндері аралығында Жезқазған қазақ-түрік лицей-интернатында Ұлытау ауданына қарасты орта мектептердің 11-сынып оқушылары Ұлттық бірыңғай тестілеуге дайындық курсынан өтті.

№1 Ұлытау орта мектебі, №2 Қорғалжын орта мектебі, №7 Сарысу орта мектебі, Жезді аралас мектеп-интернаты, Алғабас орта мектебі, Қарсақбай орта мектебі және Егінді орта мектебінен келген, барлығы – 45 оқушы Жезқазған қазақ-түрік лицей-интернатының мұғалімдерінің сабақтарына қатысып, өз білімдерін шыңдай түсті.  

Думан Рахымжанұлы, №1 Ұлытау орта мектебінің психологы:

- Аудандық білім бөлімінің ұсынысы бойынша, биылғы 11-сынып оқушыларына №3 қазақ-түрік лицей-интернатында білім алуға мүмкіндік беріліп отырғанын жеткіздік. Қызығушылық танытып, өз еріктерімен келгендері де, келмегені де бар.  Негізгі мақсатымыз – оқушыларымыздың білімдерін шыңдау және дарынды мектептің шәкірттерімен бірге ҰБТ-ға дайындау. Дайындық барысында Нұрмақов мектебі мен лицейдің дарынды оқушыларының білім деңгейін өздерімен салыстырып көрсе деген де ой болды. 13 ер бала және 32 қыз баланың ішінде «Алтын белгіге» ұсынуға лайық 6 үміткер оқушымыз бар. 

Айғаным Нұрсұлтан, Жезді аралас мектеп-интернатының 11«А» сынып оқушысы:

-  Тарих, математика және таңдау пәнім – географиядан білім алып жүрмін. Күн сайын таңғы 8.30-дан кешкі 17.00, кейде 18.00-ге дейін осында боламыз. 90 минуттан тарих пен математикаға, ал таңдау пәніне 45 минут. Түскі астан кейін тест тапсырып, нәтижесін көріп кетеміз. Мұнда осыған дейін қиын деп ойлап жүрген есептердің оңай шешу жолдарын үйреніп, қуанып жатырмыз. Мен үшін ерекше қызықты өткен сабақ – тарих болды. Мұғалімнің тақырыпты түсіндіруі, сабақты өткізуі өте қызықты. Тарихи оқиғаларды есте сақтауға ыңғайлап айтады екен мұғалім, әрі өзім бұрындары білмеген фактілерді кездестірдім.

   

 

 

 

«Өзін-өзі тану» пәні бойынша Республикалық олимпиаданың облыстық кезеңіне қатысқан Жезқазған қалалық қазақ-түрік лицей-интернатының 9-сынып оқушысы Нәсіпбек Қайрулла ІІІ орынға ие болды.

Үстіміздегі жылдың 9 қазан күні  Қарағанды облысының білім басқармасына қарасты «Сарыарқа дарыны» аймақтық ғылыми-практикалық орталығы «Өзін-өзі тану» пәні бойынша Республикалық олимпиадаға қатысып, облыс намысын қорғайтын оқушыны анықтау мақсатында іріктеу жасады.

Республикалық олимпиаданың іріктеу кезеңінде қатысқан 200-ден астам оқушы шығарма жазған. Оларға ұйымдастырушылар тарапынан «Сүйіспеншілік», «Ар-ұждан», «Бақытты отбасы», «Мен өмір сүріп жатқан әлем» атты тақырыптар ұсынылған.

Біз Нәсіпбектен қайсы тақырыпты таңдағанын және ол шығарманы қалай жазғанын сұраған болатынбыз.

Нәсіпбек Қайрулла:

- Мен – Қазақстанның патриот азаматымын. Сондықтан болар, «Бақытты отбасы» деген тақырыпқа бірден көзім түсті. «Отан – отбасынан басталады» деген сөз бар ғой, ендеше Отанымыз гүлденуі үшін еліміздегі әрбір отбасы бақытты болуы тиіс, меніңше! Қазіргі кезде, өкінішке орай,  жаңадан құрылған көптеген отбасылар қайта айырылысып кетіп жатыр. Шығармамда осы мәселенің ел болашағы үшін аса қауіпті екенін айтып, оның алдын алу шараларын өзімше көрсетіп шықтым. Қаламыздың өмір сүру жағдайларын да бір шолып,  өз отбасыма тоқталдым. Осылайша, ішімдегіні жазып болғаннан кейін қарасам, 6 парақты толтырып тастаппын. Нәтижесінде, менің шығармам ІІІ орынға лайық деп танылыпты. Қазылар алқасы марапаттау кезеңінде жылы сөздерін айтып, мені ерекше құттықтады.

2014 жылғы 23 қазанда Жезқазған қазақ-түрік лицей-интернатының әкімшілік құрамы бұрынғы әріптестері, қазіргі таңда көпжылдық еңбектерінің зейнетін көріп жүрген қазыналы-қарттарын лицейге шақырып, құрмет көрсетті.     

Бейресми жиын қонақтарына ақ ниетпен дастархан жайылды. Кездесу барысында домбырамен ән айтылып, күй де шертілді. Зейнеткерлер ұжым арасында орын алған қызықты сәттерін еске алып, мәз-мейрам болысты. «Қазірге дейін көпшілік арасында әңгіме бола қалса, «Біздің лицей...» деп қызғыштай қорып немесе мақтанып жүреміз» деп, ақтарылды қонақтар. Ізінен еріп келе жатқан іні буынға өмірлік сабақ болар ақылдарын айтып, тәрбиелі әрі білімді оқушыларының көп болуына тілектес-ниеттес екендігін жеткізді.

Жиында меймандарға Қарағанды облысы білім басқармасының «№3 қазақ-түрік лицей-интернаты» білім саласындағы қажырлы еңбегі үшін Алғыс хаттар табыстады. Сонымен қатар, зейнеткер-мамандарға ұзақ өмір, шалқар шабыт, отбасына амандық, мықты денсаулық тіледі. Қонақтар арасында бұрынғы қызметкерлермен қатар, аталмыш білім ұясында қазіргі кезде де еңбек етіп жүрген Түсіп Аяпбергенов жәнеКүнтай Искакова да бар.

Жиында сөз етілген ағай-апайлардың әңгімелерінен алынған үзіндіні лицей тарихы үшін, оқырмандар үшін жариялауды жөн көрдік.

 

Баймұхамбетова Зейнекеш, экс-бас есепші:

- 12 жыл бойы осы Жезқазған қазақ-түрік лицейінде бас бухгалтер болып қызмет еттім. Алғашқы жылдары лицейде оқушыларға қазіргідей 3-4 мезгіл тамақ беру жағынан қиындықтар болды. Соның өзінде балалар мұқалмай, білім-ғылымға құштар еді. Кейіннен мемлекет тарапынан қаржы бөлінетін жүйе орнатылды ғой. Қазір сол кездердегідей қиындықтар жоқ, барлық жағдай жасалған. Оқушыларға тек оқып, оны зейінге тоқуы ғана керек.

Аяпбергенов Түсіп, экс-дене шынықтыру пәні мұғалімі:

- Лицей құрылған жылдан бастап дене шынықтыру пәні мұғалімі болдым. Алғашында 5 жыл бойы Орхан мырза директор болды. Ол кісі бұрынғы мектеп-интернаттың ғимаратын жаңартып, қайта өңдетті. Сол уақытта 3-ақ қазақ мұғалімі болдық. Қалғанының бәрі де түрік ұлтының өкілдері. Бауырлас ел өкілдері Қазақстанның білім беру саласын кәдімгідей көтерді деп ойлаймын. Ұжым арасында ауызбіршлік, сыйласытық, тәртіп өте жақсы болған. Ұстаздар оқушылар үшін қашанда үлгі болуы тиіс қой. Зейнеткерлік жасқа толғаннан бері осы мекемеде күзетші болып келемін. Кезінде өзім оқытқан оқушылар келіп, қал-жағдайымды сұрап, өз жетістіктерін айтып қуантып тұрады.

Күнтай Искакова, кітапханашы:

- 1994 жылдан бері кітапханашы маман болып қызмет етіп келемін. Алғашқы жылдары кітап қоры аз болды, оқушыларға арнап кітаптарды сатып алып жүрдік. Кейбір оқушылар өз кітаптарын әкеліп, кітапхана қорын толтыруға атсалысты. Еліміздің баспаларынан жарық көрген оқулықтардан бөлек, Түркияның «Забак» баспасының кітаптары көп бізде. 2009 жылдан облыстық департаменттің басшылығымен кітаптар бөлініп келеді. Қазіргі кезде 4 тілде – қазақша, түрікше, орысша, ағылшынша кітаптар жетерлік қорымызда. Оқушылар кез-келген уақытта кітапханаға келіп, қалаған кітабын алып оқи алады.  

Бақытжан Идрисова, экс-диетолог маман:

- Балалар және мұғалімдер асханасының ас мәзіріндегі тағамдар құрамын зерттеп, оның нормаға сай келуін қадағалап отыратын диетолог маман болып қызмет еттім. Алматадан жоғары санатты маман ретінде бірнеше жылдық еңбек өтіліммен келіп, осы лицейге орналастым. Содан зейнеткерлік жасқа толғаннан кейін де 2 жыл қызмет етіп, жастарға орын берейін деген ниетпен жұмыс орнын босаттым. Қазір мұнда айтарлықтай өзгерістер бар. Әрине, жақсы жағына қарай. Бұл ұжымда атқарылған әрбір істі теледидардан немесе баспасөз беттерінен көріп, марқайып қаламын. Бүгін біздердің басымызды қосып, көпжылдық еңбегімізді елеп-ескеріп жат

қандары үшін өте қуаныштымын.